1.
有個大陸20歲女仔含住泡眼淚入嚟話要睇醫生。以為佢失戀俾仔飛，點知原來佢琴日空肚飲咗杯絲襪奶茶，個心卜卜咁跳得好快。成晚唔食嘢又瞓唔到，仲覺得五臟六腑扭埋一舊，好驚自己會死。越驚就越喊，越喊個心就跳得越快。佢睇咗我同事，最咪俾佢後邊瞓床抖下。瞓咗成個上晝就冇事。幾好，工都唔使番。
唔記得講重點！佢走之前梗係要攞假紙啦。話今日要做義工，想攞今日（星期三）下晝同埋下個星期三下晝嘅假紙。
乜做義工要攞假紙㗎咩？同埋你又知你禮拜四五六日一二冇事，淨係下個禮拜三下晝先至再有事咩？定係你真係俾仔飛，逢禮拜三都唔想見佢啊？咁都唔使攞假㗎，直情同佢講唔再地黎做義工咪得囉。不過當然係唔係真係做義工都唔知啦，佢話姐。
俾着係我，我會喺張假紙度淨係寫你 unfit for today’s voluntary work。不過都話唔係我睇，Too Bad～
2.
阿媽黎睇傷風感冒，睇完最尾問佢仲有冇其他嘢想睇。通常啲人一係就話攞埋乜乜物物藥，一係就話自己原來有腸胃炎等等。呢個阿媽，攞個文件夾出嚟，隊幾張表格要我填左佢。填表唔係問題，加$姐～～ 但係啲表唔係佢嘅。係佢個幾歲嘅仔用嚟報幼稚園。
唔帶個仔嚟不特止，個仔我一次都未見過。個表問身體狀況都問得幾詳細。由個頭到眼耳口鼻，到手手腳腳、皮膚、肚臍、啫啫仔，都要問正唔正常。叫佢帶個仔嚟做返身體檢查，佢話仲以為今日可以就咁填咗就得？問左我幾次係咪真係要見真人？
呢個阿媽我見得佢唔係好多次，根本唔講得上話熟。連佢有個仔我都唔知。點解啲人覺得就咁做可以填表格？佢話佢個仔日日都好忙唔得閑過嚟睇醫生。好多課外活動要參加，差啲想問埋禮拜日我開唔開工。幾歲人仔咁多嘢做，我知，香港係咁呀嘛。又一個虎媽媽～
～～
打開Freezer見到蛋黃哥死得好慘。當然係我老公貪快，想飲凍野但係唔記得咗之後攞返佢出嚟。RIP 🤣
Search